弊~世界盃又在有線

弊弊弊,四年一度世盃又到.注定唔睇波既人會悶死.焗住坐係度睇.
死死死,世盃又在有線,注定想睇波既人會炆憎死.焗住冇得揀繼續睇.

我想講,有線班講波佬,真係唔係波.究竟佢地係球迷定係旁述員?永遠只會當個波係禁區時,先會識講番場波 : "嘩呀~~~入啦! or 高出呀! or 撞柱呀!" 係禁區前面既時候呢?他們會說一公噸無關痛癢的花邊消息:邊個球員係邊間球會做左咩事啦; 邊隊球隊下季會做咩投資啦; 邊個又同邊個講生意啦... 一大堆不著邊際的消息!假充實,真空虛! 當佢地肯講番場波時,個皮球已經係守門員手上或者出左界外. 球迷想知道發生咩事呢?睇慢動作丫唔該!

大佬丫,你地班人可唔可以專心d丫,你地坐係廠入面係評述員,唔係坐係酒吧度做球迷丫.大叫,高呼等等行為,勞煩收埋啦. 可唔可以準確d講到個皮球去左邊?由邊個交去邊個度?由邊個鏟走個皮球?又由邊個執死雞頂入網呢? 唉!!難為你地都已經搞左咁多年波!

就以昨夜為例,荷蘭隊鬥塞黑一役,我眼睇住塞黑有球員,好辛苦咁帶左個波入荷蘭右邊場,幾個白衫困鬥大堆橙衫球員,大家係度死鬥難鬥,你交我截,足足有好幾十秒,我一個都唔知個d人叫咩名,一d都唔知究竟發生咩事!只係聽到幾個旁述員講: "球會將會以幾多錢做d咩野,領隊又會打算掉咩人去代入...." 喂,大佬丫,場波仲踢緊嫁,人地塞黑咁難得入到敵陣,唔該俾d面,落力d講下佢地個名,介紹下球員仲好啦! 搞到自己班人,連帶觀眾都鬼咁抽離!好似睇緊「迅間看地球」一樣抽離! 呢個感覺,令我諗起無記資深旁述員"菜肉魚",佢可以講得上係呢瓣既先鋒.永遠都係: 「丫,今日天氣都幾乾爽喎!嘩,d草地幾靚喎!哦,球迷幾瘋狂丫,哎呀~~撞柱呀!個波撞柱呀!可惜!」

其實,咁多位旁述員,你地究竟係想為家庭觀眾,營造酒吧氣氛?定係你地認唔到邊個球員打邊個球員呢?唉!此時此刻,我好想聽呀叔或者伍晃榮講波!

始終,波係圓既,薑係老既辣!